Gare Kapellen

Et wor am Joer 1929 wou den éischte wichtege Schnellzuch – den „Edelweiss“ Zürich-Bréissel – zu Kapellen duerch gefuer ass. Et sinn déi international Schnellzich, déi op der Streck Lëtzebuerg-Bréissel fueren, déi d’Geschicht vun der Kapellener Gare mat sengen Zich dominéiert hunn. An de 60er Joeren woren et déi zwee TEE-Zich „Edelweiss“ an „Iris“, déi déi bekannsten Zich woren, déi hei laanscht gefuer sinn. Während dës Zich an de 60er Joeren nach duerch Autorailen assuréiert woren, woren et an de 70er Joeren élektresch Automotricen mat véier Stroumarten, déi déi zwee uewe genannten TEE-Zich assuréiert hunn.

Lues a lues ass méi Trafik duerch de Gidderverkéier op der Transitstreck vun Antwerpen oder Ostende bis an Norditalien op Novara opkomm. De Bummelverkéier wor éischter secondär, well den éischter duerch méi eeler Material assuréiert gi wor. Mee et si grad d’Persounenzich, déi hei stall halen. Well d’Streck vu Lëtzebuerg op Klengbetten déi eenzeg Streck hei am Land ass, déi am Gläichstroum élektrifizéiert ass, ginn déi meescht Zich duerch belscht Material assuréiert; vun 2001 un hunn d’Autorailen vun der CFL-Série 2100 eng Rei Leeschtungen iwwerholl. Och speziell ass et, datt op dëser Streck lénks gefuer gëtt. Deemno fueren op Gleis 1 d’Zich op Klengbetten an vu Gleis 2 aus kënnt een an d’Stad.

An den 80er Joeren huet ee Bummelzuch besonnesch afirgestrch. Et wor de „Frittenzuch“ de kuerz no 12.00 Auer zu Lëtzebuerg a Richtung Klengbetten fort gefuer ass. Kuerz no Mamer gouf den Zuch op d’Nopeschgleis geleet, well en zu Kapellen vun engem internationale Schnellzuch iwwerholl gouf. De Bummelzuch huet also op Gleis 2 stall gehalen. Gezun gouf dësen Zuch iwwrejens vun enger Diesellok vun der CFL-Série 1600. Déi aner Bummelzich op dëser Streck si meeschtens duerch belsch Automotricen aus der Nokrichszäit assuréiert ginn, déi 1987 verschrott goufen. Happy wor een wann emol en Zuch aus de 60er Joeren an den Asaz koum. No der Verlängerung an der Ëmlackéirung vun de belschen Zich vum Typ „Break“ (Série 300), koumen dës Automotricen ugangs der 90er Joeren um Weekend an den Asaz; wietes sinn déi eeler Modeller gefuer.

Back    Garer Strooss